Naglab-ot sa malapit 20,000 ka mga indibidwal ang nagpadulong sa tatlo ka mga patyo sa Distrito sang Mandurriao, Iloilo City subong nga pista minatay.
Sa interview sang Bombo Radyo kay Police Captain Joebert Amado, hepe sang Iloilo City Police Station 5, iya ginpahayag nga sa nasambit nga tatlo ka patyo, duha diri ang pribado samtang isa naman ang pampubliko.
Suno kay Amado, nagsugod sila deploy sang mga katapo sang kapulisan sa mga patyo sugod Oktubre 31, 2024.
Ginpahayag man sini nga ang pagdugok sang mga tawo ang nag-umpisa gid alas-5:00 sang hapon tubtob sa kagab-ihon.
Sa tatlo naman ka mga patyo, ang Forest Lake Memorial Park ang may pinakamataas nga na-record kon sa diin, may estimated masobra 15,000 ang nagpadulong.
Gin-ako man sang hepe nga nangin dako nga pagpanghangkat sa ila bahin ang traffic congestion halin sa dalan sang Oñate de Leon padulong sa Sooc, Arevalo.
