Hugot nga ginadumilian ang mga pulis nga naka-assign sa venues sang FIBA World Cup 2023 nga mag-“selfie” kaupod sa international athletes ilabi na sa mga popular nga mga player nga magahampang sa tournament.
Ginpaguwa sang Philippine National Police (PNP) ini nga direktiba agud mapahanumdom sa mga pulis nga naka-deploy sa sites kun sa diin patigayunon ang hampang halin buwas, Agusto 25, tubtub sa Septyembre 10.
Suno kay PNP Spokesperson Colonel Jean Fajardo, fans man ang mga pulis sang mga basketball players, apang sa amo nga petsa, dapat nga tutukan ang trabaho.
May na-assign naman nga mga pulis sa airports kag billeting areas halin sang nagsugod sa pag-abot ang players kag delegates sang Agusto 17.
Una na nga gin-anunsyo sang National Capital Region Police Office (NCPRO) nga 2,225 ka mga personnel nga i-deploy para sa seguridad sang mga magalantaw sa World Cup. #
