ILOILO CITY – Igabalik na sa mga tag-iya ang ginpangkumpiska sang Public Safety and Transportation Management Office nga tricycle, motorsiklo, trisikad kag E-bike.
Ini ang ginkumpirma sa Bombo Radyo ni Jeck Conlu, pinuno sang Public Safety and Transportation Management Office, kadungan sang pagpatuman sang General Community Quarantine sa syudad sang Iloilo.
Suno kay Conlu, 9:00 buwas sa aga, Mayo 16, igabalik na sa mga tag-iya ang ginkumpiska nga tricycle, motorsiklo, trisikad kag E-bike.
Ang turn-over ang hiwaton sa La Paz Public Plaza kun sa diin temporaryo nga gin-impound ang nasambit nga mga salakyan.
Gin-athag man ni Conlu nga wala na sang pagabayran nga multa kag kinahanglan nga dal-on ang impounding receipt.
Magluwas diri, may igahatag man nga food packs para sa mga drivers.
Istrikto man nga ipatuman ang social distancing kag pagsuksok sang face mask sa mga pampubliko nga lugar umpisa subong nga adlaw.
Magpamilya man ukon indi, ginpahayag ni Conlu nga dapat nga sundon ang nasambit nga protocol.
May kaangtanan diri, ginpahayag sang natungdan nga hibaluon niya kun san-o ang effectivity sang ordinansa may kaangtanan sa mandatory nga pagsuksok sang face mask kag pagsunod sa social distancing agud nga maumpisahan naman ang pagpanukot sang multa.
