ILOILO CITY – Nagsaka pa sa 17 ang gin-report nga napatay bangud sa pagbaha kag landslide nga nag-apekto sa Visayas kag Mindanao sa adlaw mismo sang paskwa.
Sa amo nga report sang National Disaster Risk Reduction Management Council, lima ang nagikan sa Region 5, duha sa Region 8 kag isa sa Regiion 9 samtang siyam naman sa Region 10.
Apang, duha gid lamang diri ang na-validate kag padayon pa nga gina-imbestigaran ang 15.
Samtang, nagsaka sa walo ang numero sang mga napilasan kag 27 ka tawo ang padayon nga ginapangita.
May kabug-usan nga 48,358 ka pamilya ukon 186,459 ka mga indibidwal nagikan sa 432 ka mga barangay sa pungsod ang apektado sang baha suno sa ahensya.
Masobra naman sa 1, 100 ka mga balay ang nagkalaguba sa MIMAROPA, Region 6, Region 8, Region 9, Region 10, Region 11, CARAGA, kag Bangsamoro Autonomous Region in Muslim Mindanao.
Ang balor sang kahalitan sa agrikultura ang nagdangat na sa P62,691,864 samtang ang damage sa infrastructure ang naglab-ot sa P20,500,000.
