Nadugangan nanaman ang mga napatay nga civilian kasunod sang liwat nga pagpalupad sang missile strikes sa isa ka TV tower sa Kyiv, ang capital city sang Ukraine.
Naigu man sang pinakaulihi nga airstrike sa Kyiv ang Babyn Yar Holocaust memorial.
Padayon naman ang amat-amat nga pagpadulong sang military convoy sang Russia sa Kyiv.
Napalibutan naman subong sang Russian troops ang ikaduha sa pinakadako nga lugar sa Ukraine, ang Kharkiv.
Ginpahayag nga mas nagadamo ang air kag artillery strikes sang Russia sa sulod lang sang 48 ka oras.
Nangin emosyonal naman ang mga eksena sa special session sang European Parliament kun sa diin gin-debatehan ang nagakatabo nga kinagamo sa Ukraine.
Ini matapos nag-standing ovation para kay Ukrainian President Volodymyr Zelensky ang Members sang European Parliaments samtang suksok kag bitbit ang t-shirts nga may Ukrainian flag.
Ginpasalamatan sang Presidente sang European parliament, nga si Roberta Mesola si President Zelensky.
Nagpanawagan naman si Zelensky sa European Union nga ila ipakita nga kaupod sila sang Ukraine nga nagapakigbato sa gyera batok sa Russia.
Suno kay Zelensky, sa tunga sang trahedya nga nagakatabo sa ila pungsod, padayon sila nga makig-away para sa ila kinamatarong kag kahilwayan.
Tuman man ang kaakig sini sang napatay ang 16 ka mga bata bangud sa pag-atake sang Russia.
Samtang, humalin sang Pebrero 24, narekord sang United Nations Human Rights ang kabug-usan nga 536 ka mga napatay nga civilian lakip na ang 13 ka mga kabataan.
Ginabanta 400 ka indibidwal naman ang pilason lakip na ang 26 ka mga kabataan.Suno naman sa Russian media, may yara sang patigayunon nga second round sang peace talk subong nga adlaw sa Belarus, malapit sa Belarus-Poland border.
Ini matapos nga wala sang maayo nga resulta ang una nga peacetalk bangud nagpakatig-a si Russian President Vladymir Putin.
