Masobra na sa 2,000 ka mga tawo ang nagkalamatay sa tunga sang lapnagon nga hublag-protesta sa Iran.
Sandig ini sa US-based nga Human Rights Activists News Agency. Sa numero nga ini suno sa grupo, 1,850 ang protesters, 135 ang affiliated sa gobyerno, kag siyam ang mga nadalahig lang nga mga sibilyan.
Ginkumpirma man sang isa ka Iranian official nga 2,000 ka mga tawo ang napatay, apang iya ini ginbasol sa mga “terorista.”
Nagpanawagan naman si US President Donald Trump sa mga taga-Iran nga magpadayon sa pag-protesta. Sa iya latest social media post, nagpahayag si Trump nga manug-abot na ang bulig sang Estados Unidos.
Una na ini nga nagpaandam nga magabayad ang Iranian authorities sa ila pagpamatay.
Magasapol ang iya national security team sa White House agud nga ma-istoryahan ang iya mga opsyon agud nga intrahan ang daku nga gamo sa amo nga Islamic Republic.
Una naman nga nag-anunsyo ang US president sang 25% nga taripa sa mga pungsod nga may trading sa Iran. Na-mensyonar man sini nga posibilidad sang military action — gyera nga suno sa Iran, handa sila kag indi nila pag-atrasan.
Nagsugod ang protesta sa Iran sang Disyembre 28 sang naakig ang mga tawo bangud sang pagluya sang balor sang Iranian currency nga rial batok sa US Dollar sa Open Market.
Nagsarurot ang rial sa record low sang nagligad nga tuig, kag nagpanglakaak naman ang inflation sa 40% nga nagresulta sa pagsaka sang presyo sa adlaw-adlaw nga kinahanglanon kaangay sang cooking oil kag karne.
Sunod man nga nag-intra ang mga estudyante sa demonstrasyon. Madamo ang nagpanawagan sa pagbag-o sa pulitika. Lakip sa ginasinggit sang iban amo ang pagpamatok sa Supreme Leader sang pungsod.
Sandig sa US-based Iranian Human Rights Activists News Agency, naglapta na ang demonstrasyon sa 186 ka mga syudad kag banwa sa 31 ka mga probinsya sang pungsod.#
