ILOILO – Nagakabalaka ang Iloilo Provincial Health Office sa mataas nga numero sang kaso sang dengue sa Iloilo .
Sa interview sang Bombo Radyo kay Dr. Ma. Socorro Quiñon, Provincial Health Officer 2 sang Provincial Health Office, iya ginpahayag nga mataas ang tyansa nga may mapatay bangud sa pagtaas sang kaso sang dengue.
Suno kay Quiñon, ang kaso sang dengue sa mga babayi ang nagdangat na sa 816.
Samtang, 907 naman ka mga biktima sang dengue sa mga kalalakihan.
Lunsay naga edad isa tubtob pulo ka tuig ang may pinakamadamo nga kaso sang dengue.
Dugang pa sang natungdan, sang tuig 2018, isa lamang ang na rekord nga patay nga may 293 ka kaso samtang subong nga 2019 nagadangat na sa 10 ang patay kag 1,723 na ang biktima sang dengue.
Mahimo nga magsaka pa ang numero sang mga biktima bangud malawig pa ang mga binulan antes magtakop ang tuig.
Panugyan ni Quiñon, kun nagabatyag sang mataas nga hilanat sa sulod sang duha ukon tatlo ka adlaw, gilayon nga magpakonsulta sang doktor.
Indi nagakadapat nga magkakulba ang mga pasyente bangud wala sang bayadan nga hospital bill ang mga pasyente nga na dengue sa mga pampubliko nga ospital.
Nahibaluan nga may yara sang dengue fast lane nga ginpahamtang sa tagsa ka mga ospital agud hatagan sang prayoridad ang mga biktima sang dengue
