ILOILO CITY – Nagahingyo sang bulig ang mga biktima sang sunog sa Anggolo St., Brgy. Sambag, Jaro, Iloilo City.
Ini matapos nga 15 ka balay ang nasunog, isa ang ginbawi-an sang kabuhi samtang ang mga nasunugan naman ang temporaryo nga nagatinir sa isa ka baptist church sa nasambit nga barangay.
Sa interview sang Bombo Radyo kay Roselyn Maderse, isa sa mga nasunugan, iya ginpahayag nga makaluluoy ang ila sitwasyon bangud nga wala gid sila sang may nasalbar nga gamit.
Suno kay Maderse, lakip sa ila nga kinahanglanon amo ang utensils, gamit sa pagtulog, panapton, pagkaon kag materyales sa paghimo sang balay.
Ginpahayag ni Maderse, ang iya lamang bana nga streetsweeper ang nagaserbe nga breadwinner sa ila pamilya sa diin may yara sila sang lima ka anak.
Magluwas sa gamit kag pagkaon, ginpahayag man sang natungdan nga ang isa niya ka bata ang may yara pa sang masakit kag nagakinahanglan sang bulog.
Emosyonal naman ni Maderse samtang nagapanawagan sa diin ila gid nga ginapasalamatan sang daku ang bulig nga ila mabaton.
