ILOILO CITY – Temporaryo nga nagatinir sa multi-purpose gym sang Sitio Ilaya ang mga nasunugan sa Brgy. Tabuc Suba, Jaro, Iloilo City.
Sa interview sang Bombo Radyo kay Marelis Selviderio, City Social Welfare and Development Officer 1, iya ginpahayag nga lubos nga ginakinahanglan sang mga nasunugan amo ang food packs, bayo kag gamit sa pagluto kag pagtulog.
Suno kay Selviderio, lunsay human sa light materials ang pito ka balay ang naupos samtang anum naman ang partially damaged.
Ginpahayag ni Selviderio nga sa subong, padayon pa nga ang assessment agud nga mahatagan sang nagakaigo nga bulig ang mga nasunugan nga ginalakipan sang 22 ka pamilya.
Nahibalu-an nga sa subong, indi pa matumod ang kabug-usan nga halit sang sunog nga ginapahayag nga naghalin sa balay nga ginapanag-iyahan ni Manay Delfin.
