ILOILO CITY – Nagalibog ang ulo, nagahilibion, kag nagapanghakroy ang mga tag-iya sang nasunog nga mga balay sa Sitio Bukid-Bukid, San Pedro, Molo, Iloilo City kun sa diin nila sarang makuha ang bag-o nga mga gamit kag importante nga mga kinahanglanon.
“Tanan nga ginpanginbudlayan mo, sa isa ka pisok lang, wala na,” pahayag ni Gina Atadero, isa sa mga tag-iya sang totally burned nga balay.
Sa interview sang Bombo Radyo kay Atadero, iya ginpahayag nga wala siya kag ang iya bana sa ila nga balay sang natabo ang sunog.
“Pila man na ka tuig ang baka-baka namon para may magamit man kami bala. Bisan gamay lang ang sweldo kag bisan grabe man ang pangutang para lang makagamit kami, pero wala gid kami sang nasalbar.”
Suno sa iya, ang panapton nga ginasuksok nila amo lamang ang ila solo nga nasalbar.
Nagapanawagan subong ang mga nasunugan sa iban nga mga pumuluyo nga mahimo makabulig sa ila kag makapiyan-piyan sa ila nga mga kinahanglanon.
Una na ginpahayag sang Iloilo City Fire Station nga nag-umpisa ang kalayo sa puluy-an ni Gloria Jotes matapos nga nagpaandar ini sang generator set apang naglupok.
Ginabanta nga P280,000 ang balor sang natuga nga halit sang sunog sa lima ka totally burned nga balay kag anum ka partly burned nga mga balay. Nagapadayon pa ang imbestigasyon sang Iloilo City Fire Station.
