ILOILO CITY– Indi magpamalabag ang mga tag-iya sang mga kalan-an kag mga commercial establishments nga maapektuhan sa plano sang Department of Public Works and Highways nga road- widening sa area sang Molo, Iloilo City padulong sa Oton, Iloilo.
Nahibaluan nga may duha ka ginapilian sa pagpatuman sang proyekto sa diin ang orihinal nga plano amo nga magaumpisa ini sa Boulevard, Molo pakadto sa Sto.Niño Sur sa Arevalo sa diin pagahimuon nga four-lanes ang two-lanes nga dalan.
Samtang ang alternatibo nga plano ang pagpatukod sang coastal road nga pagatawgun nga Iloilo-Molo Boulevard ang magasugod sa bakante nga lote sa Iloilo Fishing Port Complex, pakadto sa Boulevard, Molo, direkta sa Sto. Niño Sur padulong sa Oton Public Market.
Sa interview sang Bombo Radyo kay alyas Sushmita, isa ka negosyante, iya ginpahayag nga wala sang mangin problema kun wala man sang paboran nga mga negosyo ang gobyerno.
Suno sa iya, kun pahalinon kag gub-on gid man ang ila mga napatindog nga negosyo, wala sila may mahimo basta alalangay lang sa tanan nga negosyo.
Dugang pa niya, handa siya nga mag-umpisa liwat bangud nakabawi naman siya sa iya gasto kag nakasupot naman sa sulod sang 20 anyos nga pagpanag-iya sang talabahan sa Arevalo, Iloilo City.
