Positibo ang panan-awan sang mga negosyante sa Iloilo nga mapasanyog ang ekonomiya sa masunod nga 12 ka bulan sa pihak sang ginapangatubang nga Coronavirus Disease 2019 (COVID-19) crisis.
Sa interview sang Bombo Radyo kay Francis Gentoral, Executive Director sang Iloilo Economic Development Foundation, iya ginpahayag nga base sa resulta sang survey nga ginpatigayon sang Hunyo, apisar nga mangin manubo ang ekonomiya sa Iloilo sa masunod nga tatlo tubtob anom ka bulan bangud sa halit nga tuga sang pandemya, nagalaom ang business sector nga makabawi ini sa masunod nga tuig.
Suno kay Gentoral, 78% man sa mga negosyante ang nagapangabay nga mabuligan sila sang gobyerno.
Agud kuntani nga may koordinasyon, dapat nga ang gobyerno kag ang pribado nga sektor ang magbuligay agud indi ma-uyang ang resources sang gobyerno.
Sa subong, ang resulta sang survey ang ginpakigbahin na sang Iloilo Economic Development Foundation sa Iloilo City Government kag ini ang gin-himuan na sang business recovery plan.
