ILOILO CITY – Nagbalalik sa ila pwesto ang mga manugbaligya nga ginakabig obstruction sa dalan pila ka oras matapos ang ginpatigayon nga Oplan Hawan sa pila ka barangay sa La Paz kag Lapuz, Iloilo City.
Naakit-an pa sang Bombo News Team nga may pila ka mga ambulant vendors nga nagatukod sang payag-payag sa higad sang dalan nga una na nga ginhawanan sang Public Safety and Transportation Management Office kag sang Taskforce Anti-Squatting and Illegal Structures Unit.
Sa interview sang Bombo Radyo kay alyas Arnold, ambulant vendor, iya ginpahayag nga ginpahanugutan sang Public Safety and Transportation Management Office ang pagpahamtang sang movable nga pwesto sa higad sang dalan.
Suno kay alyas Arnold, indi man sila magpahamtang sang movable nga balaligyaan kun wala sang pahanugot.
Si alyas Arnold ang nagabaligya sang barbecue sa nasambit nga lugar.
Suno naman kay alyas Bonifacio, tag-iya sang isa ka sari-sari store sa Lapuz Norte, La Paz, iya ginpahayag nga pabor siya sa ginapatigayon nga Oplan Hawan bisan nga isa ang iya tyangge sa naapektuhan sang clearing operations.
Ginpahayag ni alyas Bonficio nga ang atop sang iya tyangge nga naglapaw sa dalan ang ginatakod lang bilang proteksyon sa init sang adlaw.
Ginpahayag man sang natungdan nga wala sang kaso para sa iya nga ginkuha ang extension nga atop sang iya tyangge.
Samtang, nagpasalamat naman sa Bombo Radyo si Love Joy Hosenilla, pinuno sang Taskforce Anti-Squatting and Illegal Structures Unit.
Suno kay Hosenilla, daku ang nabulig sang Bombo Radyo sa pagpaalinton sa publiko tuhoy sa Oplan Hawan.
