Nagguwa sa isa ka pagtuon sang Philippine Institute for Development Studies nga mahinay sa gihapon ang mga negosyo sa Pilipinas sa pag-adoptar artificial intelligence ukon A.I.
Nakasaad sa report nga 14.9 percent lamang ang nagagamit sang AI bisan nga may yara man sang access sa internet.
Base sa sini nga pagtuon nga may titulo “Readiness for AI Adoption of Philippine Business and Industry: The Government’s Role in Fostering Innovation- and AI-Driven Industrial Development,” naka-konsentrar lamang ang AI adoption sa dalagku nga mga kumpaniya sa urban centers.
Ang mga sector nga may pinakamataas nga AI adoption amo ang information and communications technology nga may 7.19 percent kag business process outsourcing ukon BPO nga may 5.94 percent.
Nahibaluan nga sa data sang Philippine Statistics Authority, 90.8 percent sa mga establisyemento sa pungsod ang may yara sang computers kag 81 percent ang may internet access.
Base sa mga author sang pagtuon nga sanday PIDS senior research fellow Francis Mark Quimba, former supervising research specialist Neil Irwin Moreno kag former research analyst Alliah Mae Salazar, ang mayor nga mga balabag sa paggamit sang AI amo ang limitado nga digital infrastructure, manubo nga ihibalo kaangot sa Al technologies, kakulang sa mga ikasangkol, kag indi bastante nga pondo.
Lakip sa ginarekomendar sang pagtuon nga dapat magpokus gid ang gobyerno sa pagpa-uswag sang imprastruktura, ilabi na gid sa paghatag prioridad sa pagpasangad sang broadband connectivity, ilabi na sa mga lugar nga kulang sang serbisyo.
Ginpahayag man sang pagtuon nga kinahanglan mag-invest sa mga data center kag cloud computing facilities agud masuportahan ang nagadamo nga kinahanglanon sa datos.
Dugang pa, ginpunto sang pagtuon ang kinahanglanon nga magpokus sa pagpauswag sang human capital paagi sa pag-set sang clear metrics para sa pagtakos sa AI talent development outcomes.
Ginarekomendar man sang pagtuon nga pagatukibon ang regulatory frameworks, pagpasanyog sang kooperasyon sa tunga sang gobyerno kag pribado nga sektor, kag paghimo sang mga giya para sa responsable nga paggamit sang sini nga teknolohiya.#
