ILOILO CITY-Ginakalipay sang tag-iya kag tagdumalahan sang mga nightclubs kag balay ilimnan sa Syudad sang Iloilo ang plano ni Iloilo City Mayor Jerry Treñas nga pag-repeal sang Executive Order (EO) 146.
Ang EO 146 nagamando sang pagpasirado sang tanan nga bars, night clubs, disco bars, resto bars kag iban nga establisimento nga nagabaligya sang makahulubog nga ilimnon paglampas sang alas-dos sa kaagahon.
Sa interview sang Bombo Radyo Iloilo kay alyas Lorna, manager sang isa ka bar sa Muelle Loney, Iloilo City Proper, iya ginpahayag nga bentaha sa ila kun ma-repeal ang EO 146.
Suno kay Lorna, nagnubo gid ang ila benta humalin sang ginpatuman ang nasambit nga Executive Order kag pat-ud nga makabawi sila sa tion nga madayon ang pag-repeal sini.
Suno naman kay Elvin Tan,manager sang bar sa Yulo-Arroyo, Iloilo City Proper, 50 percent gid sang ila kita ang nadula.
Suno pa kay Tan, madamo nga mga customers nila ang nagareklamo ilabi na ang mga pangayaw bangud tubtob alas dos lamang sila nga bukas gani wala na nagabalik ang mga ini.
