ILOILO CITY – Nagagamit na sang iligal nga droga ang mga lider sang New People’s Army sa Western Visayas agud nga hayluhon kag kontrolon ang ila myembro.
Sa interview sang Bombo Radyo kay Capt. Kim Apitong, spokesperson sang 3rd Infantry Division sang Philippine Army, iya ginpahayag nga sa ginpatigayon nga hot pursuit operation sang mga suldado sa natabo nga encounter sa So. Malicolico, Carabalan, Himamaylan City, Negros Occidental sang Marso 26, na-recover sa kagamitan sang mga rebelde ang ginapatihan shabu kag paraphernalia.
Suno kay Apitong, ang iligal nga droga ang ginagamit agud mahaylo kag ma-control ang ila nga mga myembro.
Dugang pa ni Apitong, ginakabalak-an ini sang Philippine Army bangud mahimo nga ginapagamit sang iligal nga droga ang mga kabataan nga ginapasulod sa hublag.
Kung madumduman, duha ang napatay sa sunud-sunod nga encounter sa tunga sang 94th Infantry Battalion sang Philippine Army kag sang rebelde sa Negros Occidental.
Magluwas sa droga, na-recover sa encounter site ang granada, medical kit, siyam ka bala sang shotgun, isa ka scope kag mga subersive documents.
Ginapatihan sang otoridad nga naga amat-amat gwa ang mga rebelde bilang preparasyon sa ila nga anibersaryo bwas nga adlaw, Marso 29.
