ILOILO CITY – Indi bastante ang halos 800 ka mga nurses sa probinsya sang Iloilo ilabi na nga naga-alawas lang ang mga pasyente sa kadam-an nga mga district hospitals.
Sa 761 nga mga nurses, 210 ang plantilla samtang 551 naman ang contract of service.
Sa interview sang Bombo Radyo kay Dr. Paz Calopiz, head sang Hospital Management Office, iya ginpahayag nga base sa licensing requirement, kun may yara sang 60 bed ang isa ka ospital, may corresponding number of nurses ina nga amo ang i-fill in sa ospital.
Apang kun basehan lang ang mga kadamuon sang mga pasyente sa ospital suno kay Dr. Calopiz, kulang gid ang nurses ilabi na nga ang iban sa ila ang mas ginapili nga magtrabahao sa luwas sang pungsod.
Sa pagkamatuod, may mga bakante pa nga posisyon para sa mga nurse nga luyag nga magtrabaho sa ospital.
Madasig nga nagakabakantehan ang posisyon bangud mahapos na lang subong ang pagpaguwa sang mga nurses sa luwas sang pungsod.
Apang pahayag niya, ginatinguhaan man sang provincial government nga mabutangan gilayon sang tawo ukon mapangitaan sang bulos ang nabakantehan nga posisyon.
Kun may yara sang mga volunteer suno kay Dr. Calopiz, dira na nagakuha ang ospital.
Mayorya nga rason kun ngaa mas ginapili sang nurse nga maguwa sa pungsod amo ang manubo nga sweldo kag mas madamo ang opurtunidad sa luwas sang pungsod.
Ang mga nagapasweldo sa mga nurses sa district hospitals amo ang Iloilo Provincial Government sa diin, ang Nurse 1 ang nagabaton sang ginabanta P35, 000 samtang ang contract of service naman ang nagasweldo ang ginabanta P25, 000.
