ILOILO CITY – Gin-ako sang COVID-19 team sang Iloilo City Government ang paglapas sang physical distancing sa ginhiwat nga pagpanagtag sang ayuda gikan sa Department of Social Welfare and Development (DSWD) sa Iloilo Freedom Grandstand.
Nagwangal man ang pila ka mga pumuluyo bangud wala nasunod ang social distancing sa pihak nga may existing Executive Order si Mayor Jerry Treñas nga nagadumili sa pumulyo sang pagtililipon sa publiko.
May mga naglapta man nga picture sang nasambit nga aktibidad sa diin nakit-an nga wala nagatuman sang social distancing sanday Iloilo City Lone District Rep. Jamjam Baronda, Iloilo City Mayor Jerry Treñas, Iloilo City Vice Mayor Jeffrey Ganzon, kag City Councilors Ely Estante, Jojo Javellana, Allan Zaldivar kag Rudolph Ganzon.
Kaupod man sa aktibidad si Jeck Conlu, nga amo ang pinuno sang Public Safety and Transportation Management Office PSTMO kag spokesperson sang COVID-19 team sang Iloilo City Government.
Present man sanday Fernando Jose “Boyet” Rico, Punong Barangay Roberto Niño sang Calumpang, Molo, Iloilo City nga amo man spokesperson sang Liga ng mga Barangay kag Punong Barangay John Eric David sang Veterans Village, Iloilo City Proper.
Yara man sa aktibidad ang mga anak ang alkalde nga sanday Raisa kag Miguel Treñas.
Mangin ang negosyante nga si Johny Young ang nag-upod man sa event.Sa interview sang Bombo Radyo kay Mr. Jeck Conlu, iya ginapahayag nga nagtuman man ang tanan nga opisyal nga yara sa nasambit nga aktibidad sang social distancing.
Apang gin-ako ni Conlu nga sa tion nga gin-anunsyo nga maga picture taking, madasig nga nagtilipon ang tanan nga opisyal kag nalipatan man ang pagdistansya sa isa kag isa.
Gilayon man sila nga nagdistansya suno kay Conlu sang natapos ang madasig nga pagkuha sang mga laragway.
Bangud diri, nagpanugyan man ang Covid-19 team sa mga organizer sang aktibidad sa Iloilo Freedom Grandstand nga sundon ang physical distancing.
Pahayag pa sa natungdan nga tubtob sa bwas pa ang pagpanagtag sang ayuda sa mga benepisyaryo nga apektado sang kapigaduhon sa tunga sang COVID-19 pandemic.
