ILOILO CITY – Padayon nga nagalaom ang mga Ilonggo Overseas Filipino Workers nga nastranded sa Cebu nga makapauli na sila sa Iloilo.
Sa interview sang Bombo Radyo kay Niño Montinola, isa sa mga OFW nga nastranded iya ginpahayag nga humalin pa sila sang Marso 16 sa Cebu apang tubtob subong wala sa gihapon sag athag nga plano ang Overseas Workers Welfare Administration kun san-o sila makapauli.
Suno kay Montinola, sa sulod sang duha ka bulan halos nagdangat na sa P100,000 ang ila nagastos nga kun tani gamiton pa nila para sa ila pamilya.
Dugang sang natungdan, maayo lang bangud ginabuligan sila sang pamunuan sang hotel nga ila ginatiniran bangud kalabanan sa mga empleyado ang mga Ilonggo man.
Santo sa pahayag ni Montinola, makapila na nga bes nga gintinghuaan nila nga makig-angot sa Overseas Workers Welfare Administration apang wala sang nagasabat sa numero nga ila ginatawgan.
Samtang, nagalibog naman ang utok sang Overseas Filipino Worker nga stranded man sa Cebu kun diin pa sya makuha sang inug gasto bangud naubos naman ang iya kwarta sa halos duha ka bulan niya nga pagka stranded.
Sa interview sang Bombo Radyo kay Ismael Pagtulun-an, iya ginpahayag nga kun gastos lang ang pagahambalan nagasakit nalang ang iya ulo kapanumdom sini.
Suno kay Pagtulun-an apisar nga kompleto na ang ila mga requirements wala sila sa gihapon mahimo bangud daw kaangay nga ginapabay-an lang sila sang Overseas Workers Welfare Administration.
