ILOILO CITY – Nagahulat ang mga overseas Filipino workers nga ma-lift na ang ginapatigayon nga lockdown sa Shanghai, China agud nga makaboto na sa overseas absentee voting nga magasugod subong nga adlaw, Abril 10 kag magatakop sa Mayo 9.
Suno kay Bombo International Correspondent Cristina Caspillo direkta sa Shanghai, China, iya ginpahayag nga kadungan sang ginapatigayon nga lockdown, indi mahimo nga makagwa ang mga mga tawo bangud may nagalibot nga patrol car sang pulis.
Nagalaum naman sila nga makaboto na sa labing madali nga panahon bangud amat-amat na nga na-contain sang gobyerno ang COVID-19 cases.
Una na nga ginpahayag ni Commission on Elections (COMELEC) Commissioner Marlon Casquejo nga gin-aprubahan sang COMELEC en banc ang resolution nga nagapa-iway sang absentee voting bangud sang lockdown.
Naglab-ot naman sa ginabanta 1, 600 ka mga Filipino ang apektado sang amo nga resolution.
