LAMBUNAO, ILOILO- Nakasugod na sa mandatory 14-day quarantine ang walo ka Overseas Filipino Workers, nga nagpauli sa probinsya sang Iloilo sakay sa isa ka chartered flight gikan sa Cebu.
Sa interview sang Bombo Radyo kay Paolo Lamzon, isa sa mga nagpauli nga OFW, iya ginpahayag nga nagsugod na ang iya quarantine sa common quarantine facility sa Lambunao.
Suno kay Lamzon, pag-abot sa airport, ginsugat siya sang ambulansya nga ginapanag-iyahan sang Local Government Unit sang Lambunao kag gilayon nga gindala sa quarantine facility sang banwa.
Maayo ang akomodasyon suno kay Lamzon bangud matawhay ang quarantine facility, kag ginahatag man ang iya mga kinahanglanon.
Apisar nga naka quarantine, ginpahayag sang natungdan nga indi matakos ang iya kalipay matapos nakapauli sa ila banwa.
