ILOILO CITY – Ginplastar sang No to PUV Phaseout Coalition – Panay ang pila ka mga rason sa indi nila pagsulod sa kooperatiba nga kabahin sang Public Utility Vehicle Modernization Program.
Sa interview sang Bombo Radyo kay Rodrigo Cawaling Jr., convenor sang nasambit nga koalisyon, iya ginpahayag nga dako nga palas-anon sa ila ang pagsulod sa kooperatiba bangud daw kaangay nga ginsagod nila ang mga Chairman kag iban pa nga officers pinaagi sa ila ginabayad mga monthly dues.
Suno kay Cawaling, may mga officers sa mga kooperatiba nga wala man nagapanag-iya ang jeepney units kag tuyo lang nga makakuha sang kwarta sa mga operators.
Magluwas diri, kalabanan sa mga drivers kag operators ang pigado kag wala sang ikasarang nga magbayad sa masobra P2 million nga mga modernized jeepney.
Ang labi pa nila nga ginakahangaw-an amo nga maabot ang tion nga maputo ang kooperatiba kag wala gid sila sang kuhaon nga kwarta.
Nagapanawagan man ini sa gobyerno nga ipaiway na lang ang paghimo sang single franchise sa idalom sang kooperatiba.
