ILOILO CITY – Apisar nga tubtob lamang sa udto ang opisina sa Iloilo Provincial Capitol subong nga adlaw, Setyembre 29, 2023, magapabilin nga available ang serbisyo sa mga ospital kag sa iban nga opisina nga ang function ang naga-involve sa delivery sang basic kag health services, disaster preparedness kag response kag iban pa nga vital services.
Ini ang base sa Memorandum Order No. 178 ni Iloilo Provincial Administrator Dr. Raul Banias bilang pagsunod sa Proclamation No. 60 series of 1992 nga nagdeklarar sang katapusan nga semana sang Setyembre sa tagsa ka tuig bilang Family Week.
Sang Setyembre 21, 2023, nagpagwa sang Memorandum Circular No. 32 ang Malacañang nga nagapanubo sang working hours sa government offices sa idalom sang Executive branch sang Lunes, Setyembre 25 agud nga markahan ang pagdumdom sang Family Week.
Sa idalom sang amo nga memorandum circular, ang trabaho sa gobyerno ang gin-suspend humalin las-tres sa hapon sang Lunes.
Sa interview sang Bombo Radyo kay Atty. Renee “Coy” Valencia, pinuno sang Human Resource Management and Development Office, iya ginpahayag nga bangud nga masako ang adlaw sang Lunes, ginpili sang provincial government nga padayunon na lamang ang trabaho kag isaylo ang suspension subong nga adlaw sang Byernes.
Suno kay Valencia, ang mga empleyado ang ginapanugyanan nga unahon ang pagpa-in sang oras para sa pamilya sa ila tagsa ka panimalay kag dumdumon ang pagselebrar sang Kainang Pamilya Mahalaga Day nga nagasunod sa Proclamation No. 326, series of 2012.
