ILOILO CITY – Ginpahog ni House Speaker Pantaleon Alvarez ang mga local government units nga indi paghatagan sang budget kun magpakatig-a ang mga ini nga mag-upod sa Partido Demokratiko Pilipino-Lakas ng Bayan (PDP-Laban).
Sa mensahe ni Alvarez sa mass oathtaking sang kapin 4,000 nga mga opisyal sang Iloilo nga ginpatigayon sa Pototan Astrodome sa banwa sang Pototan, Iloilo, ginpahayag sini nga wala naman siya nagapamilit nga magsaylo ang mga ini sa administration party.
Ginarespeto sang House Speaker ang desisyon sang tagsa ka opisyal kag ginpasalamatan ang suporta sang mga nagsaylo sa PDP-Laban.
Apang dapat man sang mga ini respetuhon suno kay Alvarez kun indi niya ang mga ini paghatagan sang budget.
Zero budget suno kay Alvarez ang dapat sa mga opisyal nga ginhaylo na nga magsaylo sa PDP-Laban apang nagapakatig-a.
“Siyempre ang ibang probinsiya, ayaw nilang makisama. Magtiis kayo sa budget. Ayaw ko rin. Di ba? Ayaw nila, bakit? Kayo sumama. ‘Yung lider niyo ayaw sumama. Ako naman hindi namimilit eh. Kung ayaw niyo sumama, okay, ginagalang ko ‘yun, karapatan niyo ‘yun. Pero ang sabi ko nga, igalang niyo rin ‘yung karapatan ko para ma-zero kayo sa budget. ‘Di ba? Anong sasabihin ng mga kasama ko. Eh pareho lang pala… Kung sasama tayo o oposisyon pareho lang pala. Ah hindi naman patas ‘yan,” suno kay Alvarez.