Ilisipon na lang suno sa City Drug Enforcement Unit (CDEU) ang mga opisyal sang Barangay Bakhaw, Mandurriao, Iloilo City ang naga-kooperar sa mga pulis kaangot sa mga ginapatigayon nga drug buy bust operation.
Sa interview sang Bombo Radyo kay Police Captain Roque Gimeno III, officer-in-charge sang CDEU, iya ginpahayag nga wala siya nakahibalo kun nahuya ukon nahadlok ang barangay officials, apang nagapang-alang-alang ang mga ini nga magbulig.
Pahayag ni Gimeno, mabudlay sudlon ang amo nga barangay, apang daku nga suporta sa ila bahin ang civilian informants.
Indi na bag-o ang Bakhaw sa pamatin-an sang taga-syudad kun buy bust ang hambalan suno kay Roque, ilabi na nga ang nadakpan sa iban nga operasyon, nagatudlo man sa amo nga barangay nga amo ang ila source.
Lakip sa latest operations sang pulis sa Barangay Bakhaw amo ang natabo subong nga Marso nga pagdakop sa anum ka mga suspek nga yara sa balay sang main target sang drug buy bust. Nakuha sa ila ang suspected shabu nga may balor P952,000.
Sang hingapusan sang Pebrero, may mag-utod man nga construction worker kag passenger assistant officer nga nadakpan sa amo nga barangay kun sa diin nakumpiskar ang P1.9-million nga balor sang ginapasuni shabu.#
Naaresto ang duha sa joint operation sang CDEU, Special Weapons and Tactics (SWAT) Team, Revitalized Pulis sa Barangay (RPSB) Team Bakhaw, kag Iloilo City Police Station 10 – Station Drug Enforcement Team. Sinemana ang intense surveillance nga ginhimo kasunod sang community tips kag bulig man sang RPSB Bakhaw.#
Photo from ICPO
