ILOILO CITY- Ginduso sang alkalde sang Buenavista, Guimaras nga malakip sa makabaton sang emergency subsidy sang Department of Social Welfare and Development ang mga barangay officials nga nagabaton sang mas manubo sa P6,000 nga honorarium kada bulan kag ang mga Sangguniang Kabataan officials nga may pamilya nga wala naman sang ginabaton nga honorarium.
Sa interview sang Bombo Radyo kay Mayor Eugene Reyes, iya ginpahayag nga nagpadala siya sang sulat kay Department of Social Welfare and Development Secretary Rolando Bautista nga nagaayo nga ilakip sa makabaton sang ayuda ang nasambit nga mga opisyal sang barangay.
Suno kay Reyes, inisyatibo niya ini matapos ang ginpatigayon nga teleconference upod sa iban nga mga alkalde sa Western Visayas lakip na ang Regional Director sang Department of Social Welfare and Development Region 6 nga si Ma. Evelyn Macapobre.
Ginpahayag sang alkalde nga makabig man nga frontliner ang mga brgy. officials kag Sangguniang Kabataan officials bangud ginbutang man nila ang ila kaugalingon sa risgo bangud sila ang nagapanguna sa mga ginapatuman nga protocol sa ila barangay sa tunga sang Coronavirus disease 2019 pandemic.
Suno kay Reyes, apisar nga may yara man sang ginasunod nga Memorandum Circular 14 series of 2020 nga amo ang special guidelines sa pagpatuman sang emergency program, nagalaum siya pamatian ini sang tiglikom kag mabatyagan nga nagakadapat man ang mga ini magbaton sang ayuda.
