Ginakabig nga isa ka pagpanghangkat sa mga kabarangayan nga mangin permanente na ini nga drug-cleared barangay.
Ini bangud kun kaisa indi kontrolado sang baranagy ang mga pumuluyo nga nagaduso ukon nagagamit sang illegal nga droga.
Sa interview sang Bombo Radyo kay Punong Barangay Elfren Cenayo sang Don Esteban, Lapuz, Iloilo City, iya ginpahayag nga suportado niya ang kampanya batok sa illegal nga droga.
Suno sa iya, wala gid ini nagkulang sa paglaygay sang iya mga residente nga untaton na ang ini nga illegal nga butang bangud makaguba ini sa kabuhi sang iban.
Aminado si Cenayo nga may yara gihapon sang mga residente sa ila lugar nga nagagamit sang illegal nga droga kag padayon ang pag-validate sang mga kapulisan agud nga madakpan ang mga ini.
Pahayag pa ni Cenayo, padayon ang iya pag-engganyo sa mga surrenderee nga tapuson ang ila rehabilitation program agud ma-clear na ang iya nga pangalan sa Barangay Anti-Drug Abuse Council ukon BADAC.
Suno pa kay Cenayo, may yara sang mga guidelines nga kinahanglan sundon antes ma-deklarar nga drug-cleared ang isa ka barangay gani iya pa ginahulat nga makompleto ang iban nga kinahanglanon nga dokumento.
Nagapanawagan man ini sa iya mga pumuluyo nga magkooperar gid sa mga programa sang barangay kag kapulisan.
