ILOILO CITY – Ginbalewala lang sang mga opisyal sang Iloilo ang panibag-o nga banat ni Presidente Rodrigo Duterte.
Ini matapos gintawag ni Duterte nga “bedrock of drugs” ukon bagsakan sang iligal nga droga ang Iloilo.
Sa interview sang Bombo Radyo, ginpahayag ni Iloilo Governor Arthur Defensor Sr. nga wala man direkta gintumod sang Presidente kun ang siyudad ukon probinsiya sang Iloilo ang ginhingadlan sini, gani iya na lang pabay-an ang Presidente sa mga ginpangbuy-an sini nga pahayag.
Una naman ginpahayag ni Iloilo City Mayor Jed Patrick Mabilog nga wala na ini sang plano nga patulan si Pres. Duterte.
Nahibaluan nga sa iya speech kahapon kadungan sang pagbaton sang military assistance sa China, ginpahayag ni Duterte nga ang Iloilo ang bedrock sang illegal drugs bangud nga gina-export ang droga padulong sa Iloilo para sa napatay nga drug lord nga si Melvin Odicta Sr.