ILOILO CITY – Ginpasakaan sang kaso sang mga estudyante sang Northern Iloilo Polytechnic State College (NIPSC), ang presidente sang kolehiyo nga si Ma. Theresa Palmares kag Vice President for Finance Hilda Magsisa.
Ini ang may kaangtanan sa kapaslawan sang mga estudyante nga makakuha sang ila records bangud sa ginaalegar wala mabayaran nga scholarship program ni anay Iloilo Fifth District Rep. Niel Tupas Jr. sa nasambit nga buluthuan.
Sa interview sang Bombo Radyo, ginpahayag ni Darryl Montales, ginkasugtan nila ang pagpasaka sang civil case batok sa mga opisyal sang kolehiyo bangud nga indi pag-ihatag ang ila Transcript of Records kag iban pa nga credentials.
Ini matapos magdesisyon ang NIPSC nga indi na pag-ihatag ang credentials sang mga scholars bangud sa ginapahayag wala mabayaran nga utang ni Tupas sa scholarship program.
Una na ginpahayag ni Iloilo Fifth District Rep. Raul Tupas nga nagalab-ot sa masobra P70 million ang wala mabayaran sang iya utod nga anay kongresista ang scholarship program sini.
Apang hugot naman ini nga ginpanginwala sang anay kongresista kag ginpahayag nga P100 million ang ginbayad sini sa scholarship program nagikan sa iya Priority Development Assistance Fund (PDAF).
Ang anay mamalidha ang isa sa mga nagbulig sa mga estudyante nga magpasaka sang civil case batok sa mga opisyal sang nasambit nga kolehiyo.