Nagapanawagan ang mga opisyal sang Barangay Nabitasan, Lapaz, Iloilo City sa iloy sang patay nga lapsag nga ginhal-id sa idalom sang mga pamalay sa Zone 2A sa nasambit nga lugar.
Ang lapsag ang ginabanta nagaedad walo tubtob siyam ka bulan.
Sa interview sang Bombo Radyo kay Punong Barangay Barbara ‘Barbie’ Joy Aroza, iya ginpahayag nga mas maayo kun makig-angot ang iloy sang bata sa ila lugar agud nga mabuligan man ini.
Suno kay Aroza, kun sa lugar man nila nagapuyo ang iloy, posible nga gintago sini ang iya pagbusong, wala ini nagpalista sa barangay kag wala man nagpa-prenatal.
Apang suno sa opisyal, halos negatibo ang resulta sang ila pagpangusisa kag wala sila sang may natumod nga posible iloy sang bata sa ila lugar.
Nagapangabay man ang natungdan sa iban pa nga pamunuan sang barangay sa syudad nga buligan sila sa pagtumod sang iloy sang patay nga lapsag agud nga mabuligan man ini kag matumod ang rason sa likod sang makahalanusbo nga gindangatan sang bata.
