Ginkakibot sang mga opisyal sang Rizal Pala-Pala II, Iloilo City Proper ang pagpadalagan bilang alkalde sang syudad sang Iloilo sa 2022 elections sang isa nila ka pumuluyo.
Nahibaluan nga kahapon, nag file sang Certificate of Candidacy (COC) si Mr. Vicente Parania Ang, senior citizen, indi pamilyado kag residente sang nasambit nga lugar.
Siya man ang pinakauna nga nagbunggo sa pagka-alkalde kay Iloilo City Mayor Jerry Treñas.
Sa interview sang Bombo Radyo kay Punong Barangay Noel Soliman sang Rizal Pala-Pala II, Iloilo City Proper, iya ginpahayag nga pagbyahe sang traysikad ang trabaho ni Ang kag yara sa luwas sang pungsod ang iban niya nga mga utod.
Suno kay Soliman, kilala si Ang bilang maalam nga tawo apang tuman kataas ang panulok sini sa kaugalingon.
Madalom man ini magpaminsar suno kay Soliman.
”Ini siya daw medyo pirmi ni gadalom ang iya pinsar bala daw kalayo pirmi sang iya ginapaminsar. Wala man ni sang rekord sa barangay. Pagkita ko sa Facebook, siling ko, baw grabi ba nagpadalagan sa Mayor, nakibot ko, mga pumuluyo namon nakibot nga amo na bi. Maayo tani kun sa barangay lang, diri gid ya ya. mapadalagan sa iya ya Mayor. Siling ko ano, mabunggo gid sa kay Mayor Treñas? Natingala gid ko.”
Dugang pa sang opisyal, nagpadalagan man sadto si Ang bilang Barangay Kagawad apang wala man nagdaog.
