Ginpadal-an na sang sulat sang mga legal counsel sang mga myembro sang Sangguniang Panlunsod nga nag-boycott sang tinalikdan nga mga session ang mga executive offices sa Iloilo City Hall agud magpaathag sa rason sa ila pagpamalabag sa pagdeklarar sang state of calamity sa Syudad sang Iloilo.
Ang nasambit nga sulat ang ginpirmahan sang mga abogado nanday Vice Mayor Jeffrey Ganzon, Councilors Love Baronda, Ely Estante, Leila Luntao, Armand Parcon kag Jay Trenas nga lunsay kaalyado ni Iloilo City Lone District Cong. Jerry Treñas.
Lakip sa mga ginpadal-an sang sulat amo si Iloilo City Mayor Jose Espinosa III, City Administrator Atty. Hernando Galvez, Iloilo City Council Secretary Ruth Arroyo, City Engineer Roberto Divinagracia, City Enviroment and Natural Resources Office (CENRO) head Noel Hechanova, City Social Welfare and Development Office (CSWDO) Head Gene Garingalao, Disaster Risk Reduction and Management Office (DRRMO) Operations Officer Darwin Papa, City Treasurer Jinny Hermano, City Accountant Michelle Lopez, City Budget Officer Ninda Atinado kag General Services Office (GSO) head Joren Satorio.
Kaundan sang sulat amo ang pagpa-athag sang mga konsehal sa ila pagpamalabag sa pagpaklarar sang state of calamity.
Diri kag ila nga ginpaathag nga ang pagpasar sang state of calamity nanday Iloilo City Councilors Plaridel Nava, Joshua Alim, Liezl Joy Zulueta-Salazar, R Leone Gerochi, Mandrie Malabor, Candice Tupas,Lyndon Acap kag Eduardo Peñaredondo ang santo sa mando ni Iloilo City Mayor Jose Espinosa III, pinaagi kanday City Administrator Atty Hernando Galvez, Chief of Staff Rommel Castro, Iloilo City Agriculturist Romulo Pangantihon, Local Economic and Enterprise Office (LEEO) Operations Officer Darwin Joemil Papa kag Local Disaster Risk Reduction and Management Officer IV Donna Magno.
Diri kag ginpahayag sang mga legal counsel nga ang deklarasyon sang state of calamity ang paglapas sa Republic Act No. 10121 sa diin nasaad nga nagamit sang sala nga data agud makakuha sang funding.
Magluwas sini, indi man mahimo nga makapagwa sang pondo sang gobyerno subong nga election period kun wala sang pahanugot sang Commission on Elections (Comelec).
Sa ulihi, ginpanawagan sang mga legal counsel sa Comelec Law Department, National Disaster Risk Reduction and Management Council kag sa Office of the Ombudsman nga imbestigaran ang nasambit nga butang kag pasakaan sang kaso ang alkalde, mga executive assistant sini kag sa mga konsehal nga amo ang sa likod sa pagpasar sang state of calamity sa Syudad sang Iloilo.
