Naumpisahan na ang pagpangusisa sa Barangay Tacas, Jaro, Iloilo City may kaangtanan sa identity sang iloy sang ginhal-id nga fetus sa Calajunan Sanitary
Landfill sa Barangay Calajunan sa distrito sang Mandurriao.
Ini bangud sa Tacas, Jaro ang ginatudlo sang General Services Office nga ginhalinan sang truck kun sa diin ginkarga ang ginabanta walo ka bulan nga lapsag nga babayi kag ginhaboy sa Calajunan.
Sa interview sang Bombo Radyo kay Punong Barangay Joseph Poral, iya ginpahayaga nga 26 sa ila rekord ang nagabusong nga mga babayi sa ila lugar, apang 11 sa sini nga numero ang subong nagadala sang 7-8 ka bulan nga lapsag.
Ginpangtawgan na ini nga mga iloy suno kay Poral agud makamusta ang ila sitwasyon.
Agud mas mapabakod pa ang pag-imbestigar, isa-isahon sa pagbisita ang 11 ka mga iloy suno kay Poral kag i-check ang kahimtangan sang bata.
Una na ginpahayag sang General Services Office nga pasabton gid ang iloy sang ginhal-id nga fetus.
Subong nga bulan sang Nobyembre, tatlo na ka lapsag ang ginpanghaboy sa Calajunan Sanitary Landfill kag lunsay wala nakilal-an kun sin-o ang mga ginikanan.
