LAMBUNAO ILOILO– Hugot ang pagbantay sang mga opisyales sang Barangay sa banwa sang Lambunao sa ila mga pumuluyo, matapos may yara sang nagpositibo sa coronavirus disease 2019 sa nasambit nga banwa.
Sa interview sang Bombo Radyo kag Malag-it Punong Barangay Delmar Pilla, iya ginpahayag nga ginakontrol nila ang mga pumuluyo nga nagagwa sulod sa ila barangay.
Suno kay Pilla, ginatinguhaan kag ginapaintindi nila sa pumuluyo kun ano kaimportante ang pagpabilin sa sulod sang panimalay sa subong nga may yara sang ginapangatrubang nga krisis.
Pahayag pa ni Pilla, tagsa ka adlaw, may salakyan nga nagapadulong sa ila banwa agud magbakal sang mga kinahanglanon sang mga pumuluyo.
Kun personal naman ang transaksyon sang isa ka persona, ginapahanugutan nila ini nga makagwa sa ila barangay, apang sa tion nga magbalik ini maagi sa disinfection antes makasulod.
Padayun naman suno kay Pilla ang paghatag nila sang relief good sa pumuluyo lakip na ang alcohol.
Nagapanawagan man ang natungdan nga kuntani magkooperar ang tanan bangud ang ila ginahimo ang para sa ila kaayuhan kag kaayuhan man sang bug-os nga barangay.
