Padayon ang imbestigasyon sang kapulisan sa pagkilala sang sunog nga bangkay nga nasapwan sa Pavia, nga ginapatihan nga ini amo si Frank Rois Barbasa, base sa mga personal nga gamit nga nakuha malapit sa crime scene.
Sa interview sang Bombo Radyo kay PCapt. Ritz Field Presquito, Hepe sang Pavia Municipal Police Station, iya ginpahayag nga sang ginpakig-angutan sang kapulisan ang anay kahagugma ni Barbasa, nangin emosyonal ini sang ginpakita ang litrato sang wala pa makilala ang sunog nga bangkay.
Suno kay Presquito, apisar nga nangin emosyonal ang ex-girlfriend ni Barbasa kaupod ang iloy sini, wala man ini naghatag pa sang dugang nga pahayag.
Nahibaluan nga ang duha anay magkahagugma kag pareho nga estudyante sang College of Nursing sa isa ka unibersidad sa Iloilo City.
Apang suno sa tiya ni Barbasa, nagbulagay na ang duha sang nagligad pa nga Enero ukon Pebrero.
Suno naman sa malapit nga abyan sang pamilya Barbasa, nagkomunikar ang anay kahagugma ni Frank Rois apat ka adlaw antes ang insidente kag nagpahayag nga luyag sini makig-istorya sa iya.
Sa interview sang Bombo Radyo kay Ray Rico, isa ka family friend sang Pamilya Barbasa, ginpahayag sini nga ginplano kuntani ni Barbasa nga mag-overnight sa balay sang iya abyan sa Pavia antes magpauli sa Roxas.
Apang sang alas-7 sang gab-i sang Abril 28, naglisensya ini nga makadto sa GT Mall kag ginbilin ang iya bag.
Ulihi, naka-komunikar pa ini sa iya tiyo nga yara sa Germany pasado ala-1 sang kaagahon sang Abril 29.
Sang mga alas-4 sang kaagahon sang amo man nga adlaw, may nasapwan nga sunog nga bangkay sa lugar.
Naggwa man sa imbestigasyon nga sang alas-5:03 sang hapon sang Abril 28, naghalin si Barbasa sa ila ginatiniran sakay sang blue Suzuki sedan nga ginapatihan nga Grab vehicle, apang wala nahibaluan sang iya pamilya kun diin gid ini nagkadto.
Nahibaluan nga suno sa kapulisan, posible nga ang krimen natabo sa sulod sang nasambit nga subdivision antes gindala ang bangkay sa lugar kun diin ini ginsunog.
Sa karon, ginpahayag sang mga otoridad nga may ginasundan na sila nga indi magnubo sa isa ka person of interest nga posible may kaangtanan sa krimen, samtang padayon ang ila imbestigasyon.
