Ginalauman na sang mga otoridad sang 50 ka estado sang Amerika kag ang District of Columbia ang posible nga pagkinagamo sang mga protesters antes ang natalana nga inagurasyon ni President-elect Joe Biden.
Suno kay Bombo International Correspondent Arnel Noel Gellada, direkta sa Houston, Texas, USA, iya ginpahayag nga madamo sa supporters ni outgoing US President Donald Trump sa ila nga lugar ang nakabaton na nga pahalinon na ini bilang presidente.
Apisar sini suno kay Gellada, indi mapaktan kun ano pa ang mga tikang nga himuon sang loyal kag die hard fans ni Trump.
Nakahanda na ang mga kapulisan apang wala sang kasiguraduhan kun ano ang mga mahimo magluntad sa adlaw mismo sang inagurasyon.
“Wala kita kahibalo sang mga plano gid ya sang mga loyal Trump supporters nga mga die hard gid ya bala, amo na nga balantyan ini kay may mga balita nga mahimo sang mga tikang ang mga loyalist gid ya ni President Donald Trump sa pag-abot sang inauguration day,” pahayag ni Gellada.
Ginpahayag man ni Gellada nga posible gamay lang ang magatambong sang inagurasyon bangud sa pagkahangawa sang posible kinagamo.
Matandaan nga nagpaandam na ang Federal Bureau of Investigation (FBI) nga posible may mga armed protests nga patigayunon ang mga supporters ni US President Donald Trump sa nanuhay-tuhay nga mga estado sang pungsod.
