ILOILO – Kutub na lang sa katapusan sang Marso subong nga tuig ang ginhatag nga tion para sa mga pulis nga maka-angkon sang normal nga Body Mass Index.
Ini ang may kaangtanan sa memorandum nga ginpaguwa ni Philippine National Police Chief Police General Archie Gamboa nga dapat wala sang overweight kag obese nga mga pulis para sa mas maayo nga performance.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga may yara sang memorandum nga ginpaguwa si Regional Director Police Brigadier General Rene Pamuspusan nga kutub na lang sa katapusan sang Marso ang ginhatag nga kahigayunan sa mga pulis agud nga mangin physically fit.
Suno kay Malong, ang nasambit nga memorandum ang indi pa mahimo nga mapaguwa bangud nga wala pa ini napirmahan sang pinuno sang Learning and Doctrine Development Division nga amo ang in-charge sa monitoring.
Ginpahayag ni Malong nga ginahulat pa ang complete guidelines tuhoy sa nasambit nga mandu apang sa bahin sang Police Regional Office 6, ila nga ginasunod ang cross fit program.
Sa tion nga mapaslawan ang isa ka pulis nga maka-angkon sang normal nga Body Mass Index, may yara sang administrative sanction nga igahatag kag nakadepende na sa ila justification kun nga-a wala nila nasunod ang nasambit nga mandu.
Nauna nga ginpahayag ni Gamboa nga indi maka-apply sang promotion ang mga pulis nga overweight kag obese.
Santo sa mga eksperto, makabig nga underweight ang mga may yara sang Body Mass Index nga manubo sa 18.5, normal naman ang may yara sang 18.5 tubtub 24.9, overweight naman ang may yara sang 25 tubtub 29.9 kag obese ang may Body Mass Index nga masobra sa 30.
Paagi sa metric system, ang Body Mass Index ang mahimo nga mahibalu-an paagi sa pag-divide sang weight in kilograms ukon bug-at sa height in meters squared ukon kataason.
