ILOILO CITY- Nagpaandam ang Provincial Health Office nahanungod sa mga pagkaon nga ginakonsumo subong nga holiday season.
Sa interview sang Bombo Radyo kay Dr. Ma. Socorro Quiñon,Provincial Health Officer, iya ginpahayag nga kinahanglan nga mangin mapili sa pagkaon kag mas maayo nga makahibalo maglikaw sa pagkaon nga indi maayo sa lawas.
Suno kay Quiñon, likawan ang pagkaon sang matambok ukon maalat nga mga pagkaon bangud ini ang masami ginatunaan sang balatian kaangay sang hypertension kag sakit sa corazon.
Kun indi gid mapunggan, panugyan ni Quiñon nga diutay lang ang kaunon ukon hagan-haganon mangin sa mga ilimnon.
Suno pa sa iya, mas maayo man nga opsyon nga sa balay ginaluto ang pagkaon nga kaunon sa baylo nga ginabakal sa mga restaurants ukon iban pa nga food establishments agud masiguro nga safe ang ginapakaon mo sa imo pamilya.
Dugang pa niya, indi man dapat magkalipat nga mag-ehersisyo.
