ILOILO CITY – Wala sang pagbag-o sa mga pagsulundan sa syudad sang Iloilo kasunod sang pag-extend sa alert level 1 humalin Marso 16 tubtob Marso 31.
Ang syudad sang Iloilo upod ang 46 pa ka iban nga lugar sa pungsod ang ipaidalom sa alert level 1 base sa ginpagwa nga resolution sang National Inter-Agency Task Force (IATF).
Sa interview sang Bombo Radyo kay Mr. Jeck Conlu, spokersperson sang COVID-19 team sang syudad, iya ginpahayag nga natalana nga magpagwa sang executive order ang alkalde nga naga-extend sang classification sang syudad.
Sa idalom sang alert level 1, 100% na ang capacity sang tanan kag indi na pag-ipatuman ang “no vaccine, no entry” policy sa mga opisina kag establishments.
Nagapanugyan sa gihapon ang COVID-19 team sa publiko nga magsunod sa gihapon sa minimum health protocol.
Dugang pa ni Conlu, wala pa nakasabat ang IATF angut sa appeal nga ipaidalom ang syudad sa alert level 0.
Samtang, nagapanawagan man ang syudad sa ginikanan sang mga kabataan nga naga-edad 5-11 anyos nga magpabakuna bangud nakita sang team nga manubo ang turn out sang mga nagapabakuna sa nasambit nga age range sang mga menor de edad.
