Gin-athag sang COVID-19 response team nga exempted sa ginadumilian nga mga mass gatherings sa syudad sang Iloilo ang tanan nga pagtililipon sa opisina kun sa diin ginahimo sang mga tawo ang ila official function ukon essential function.
Santo sa Section 2 sang Executive Order No. 12 Series of 2021, nakasaad nga epektibo Pebrero 1 tubtob Pebrero 8, ginadumilian ang anuman nga party ukon anuman nga sahi sang pagtililipon kaangay sang kasal, anniversary, kag iban pa — FOR WHATEVER PURPOSE — sa pribado ukon pampubliko nga venue MAGLUWAS lang kun magpamilya nga nagatinir sa isa lang ka balay ang attendees ukon ang mga nagatambong.
Sa interview sang Bombo Radyo kay Jeck Conlu, COVID-19 spokesperson sang syudad, iya ginpahayag nga ini nga pagsulundan ang limitado lamang sa mga pagtililipon nga may COMMON PURPOSE nga mag-imbita sang mga tawo agud magselebrar kag magsalo-salo.
Suno kay Conlu, ginapahanugutan gihapon ang mga session, meeting, kag iban pa nga aktibidad sang mga opisina kun essential ini kag kun nagaserbe sang official function.
Nahibaluan nga ginpapanaug ini nga executive order matapos natukiban sa intensive contact tracing sang Iloilo City Government nga ang local cases sa syudad ang masami tuga sang increased gatherings bangud sang mga selebrasyon.
