Mahilig ka bala sa mga maalat kag kun kaisa lang naga-inom sang tubig?
Suno sa isa ka urologist, ang balatian sa bato ukon kidney stone ang kabangdanan sa pag-angkon sang kristal sa bato bangud sa kakulangan sang tubig ukon pagbara sang alagyan sang ihi.
Ginpaathag ni Dr. Samuel Vincent Yratorza nga may duha ka mga kristal sa kidney; amo ang calcium crystals kag uric acid.
Suno sa eksperto, kun masami naga pangihi ang tawo, ginapaguwa sini ang mga krystals agud nga indi na ini mangin bato.
Ang sintomas sang balatian sa bato amo ang tuman nga pagsakit sang kilid sa idalom nga bahin sang gusok.
Sa tuman nga sakit sa kilid, mahimo nga malipong ang tawo, ma-eksperyensyahan ang paglingin sang ulo kag pagsuka.
Isa man sa mga sintomas amo ang mapula nga ihi nga daw kaangay sa duag sang dugo ukon tsaa.
Agud nga malikawan ang sakit sa bato, mag-inom sang duha tubtob tatlo ka litro ukon walo tubtob pulo ka baso sang tubig kada adlaw.
Panugyan sang eksperto, importante ang regular nga pag check-up sa doktor agud nga matapna gilayon ang ano man nga sahi sang balatian.
