GUIMARAS – Nahangpan sang mga pamilya sang mga nagtaliwan nga mga pasahero sa nagkulob nga mga motorbanca sa Iloilo strait kun ngaa wala nakabisita si Presidente Rodrigo Duterte sa mga haya sang biktima sa probinsya sang Guimaras.
Ini bangud sa malain nga tyempo rason nga wala na nadayon ang Presidente sa pagpadulong sa Guimaras kag nagdiretso na lamang ini sa pagpadulong sa Gegato Abecia Funeral Homes sa Jaro, Iloilo City.
Sa interview sang Bombo Radyo kay Vicente Elseario, bana sang nagtaliwan nga si Cynthia Elseario , iya ginpahayag nga humalin las-8 kahapon sang aga ang hulat nila kay Duterte nga makaabot sa Guimaras apang bangud sa mabaskog nga hangin kag ulan, wala na ini nadayon.
Suno kay Vicente, apisar wala ang presensya sang Presidente, nagapasalamat man siya sa gihapon bangud yara man si Department of Transportation Secretary Arthur Tugade nga ginsugo niya nga magpadulong sa Guimaras kag ipalab-ot ang pagpakig-unong kag bulig pinansyal.
Dugang pa sang natungdan, kun nakabisita ang presidente sa Guimaras, luyag niya kuntani nga hingyuon ang pagpasigurado nga mangin hilway na ang pagbyahe sang mga tawo sa mga motorbanca.
