ILOILO CITY – Nagakinahanglan sang madamu nga development ang mga pantalan sa Iloilo kag Guimaras.
Ini ang nakita ni Department of Transportation Secretary Arthur Tugade kadungan sang iya pagpadulong sa syudad sang Iloilo kag Guimaras.
Sa interview sang Bombo Radyo kay Tugade, iya ginpahayag nga kinahanglan nga dugangan ang nagabiyahe nga RORO vessel kag fastcraft agud nga indi magdagsa ang mga pasahero sa pantalan ilabi na kun malain ang tiyempo.
Suno kay Tugade, magluwas sa kulang nga RORO vessel kag fastcraft, nagakinahanglan man sang ‘upgrading’ ang mga pantalan.
Ginpahayag man sang tiglikom nga kinahanglan nga ipatuman na ang electronic ticketing agud nga indi na mabudlayan ang mga pasahero sa pagsulat sang ila pangalan kag mas mahangpan ang kaundan sang manifesto.
Isa man sa ginsaway sang natungdan amo ang kakulang sang communication equipment sa mga pantalan kag sa tagsa ka sakayang pandagat agud nga mapadasig ang pagpaalinton ilabi na kun may yara sang emerhensya.
