ILOILO CITY- Ginpanugyanan sang Western Visayas Transport Cooperative ang tanan nga mga pasahero nga magpalab- ot gilayon sang reklamo sa ila nga talatapan kun may mga konduktor sang modernized jeepney nga naga- overcharge.
Ini kasunod sang ginpalab-ot sa Bombo Radyo nga reklamo sang pila ka mga estudyante nga may mga konduktor nga sobra ang ila ginasukot nga plete.
Pinakaulihi nga reklamo diri amo ang iya sang isa ka estudyante sang nagsakay ini sa modernized jeepney humalin sa Capitol kag manaog lang ini kuntani sa Jaro plaza apang ginkakibot sini nga ginhatagan siya sang utod nga ticket kag 21 pesos ang nakabutang nga 9 pesos gid ang deperensya sa 12 pesos nga ginabayaran niya.
Sa interview sang Bombo Radyo kay Raymundo “Boyet’ Parcon, Chairman sang Western Visayas Transport Cooperative, iya ginpahayag nga sala gid ang pag- isyu sang utod nga ticket sa pasahero.
Suno kay Parcon, imbestigaran nila ini sang maayo paagi sa general manager, operation manager kag sa iya bilang chairman sang nasambit nga kooperatiba kaga pagahatagan sang nagakaigo nga sanction ang konduktor.
Sa bahin naman sang overcharging sa mga pasahero, sa first offense, ang konduktor ang ipatawag anay; sa 2nd offense, i-suspend ini kag ipatawag man ang tagreklamo; kag sa 3rd offense, imbestigahan; kag sa 4th offense, i-terminate na ang konduktor.
Gintuad naman ni Parcon nga madamo na ang gin-suspend bangud sa amo nga akto kag wala ini gina- tolerate.
Dugang ni Parcon, sang nagligad nga semana, may gin-suspend na nga konduktor bangud lima ka beses na ini nga ginreklamo sang overcharging kag ang wala pagremit sang kita.
