Ginatumod nga rason sang Iloilo City Traffic and Transportation Management Unit ang wala pagsunod sang pila ka drivers sa ginpahamtang nga loading kag unloading markings sa mga dalanon rason nga nagapugok ang trapiko sa syudad.
Sa interview sang Bombo Radyo kay Ret. Pcol Uldarico Garbanzos, head sang Iloilo City Traffic and Transportation Management Office, iya ginpahayag nga masami nga nagapundo ang pila ka mga pampubliko nga salakyan kaangay sang jeep kag bus, sa indi insakto nga lugar sa pagkuha sang ila mga pasahero labi na kon oras sang rush hour.
Ginpangabay man sang ahensya sa publiko ilabi na sa mga drivers nga magkooperar sa pagsunod sa mga signage kag markings nga ginbutang bilang reference sang public utility vehicles agud mangin matalunsay ang dalagan sang trapiko.
Panawagan man sang ahensya sa mga pasahero nga maghulat sa designated loading kag unloading areas para malikawan ang disgrasya kag indi na magdugang ang trapiko sa dalanon.
Sa madumduman nga ini nga isyu nangin kabahin man sang diskusyon sa Land Transportation Franchising and Regulatory Board (LTFRB) samtang ginahimo ang plano paano mas paathagon kag mapauswag ang traffic discipline sa syudad.
