ILOILO CITY – Nagdinaguso ang mga pasahero sa Parola wharf sa una nga adlaw sang pagbalik sang trabaho, subong nga Mayo 18.
Sa interview sang Bombo Radyo kay SB Member Art Cartel Jr. sang Buenavista, Guimaras, iya ginpahayag nga wala na ginasunod sang mga pasahero ang physical distancing bangud nga wala man sang may nagagiya kun sa diin dapat magalinya agud nga makasakay sa pump boat padulong sa Guimaras.
Suno kay Cartel, ang iban sa mga pasahero ang inoras na nga nagapila apang wala sa gihapon nagahulag ang linya bangud sa indi maathag nga sistema.
Ginpahayag ni Cartel nga bilang pasahero kag public official, iya nga ginhambalan ang pulis nga nagabantay nga kun mahimo giyahan ang mga pasahero agud nga indi magdinaguso sa pantalan.
Nagsabat ang pulis nga ginsiradhan ang City Mall Parola agud nga indi magdinaguso sa sulod ang pasahero samtang nagahulat nga makasakay sa pump boat.
May nag-abot nga augmentation force suno sa opsiyal apang wala man sila sang may nahimo rason nga ang mga pasahero ang nagasala-sala kun sa diin magalinya.
