Diutay na lang ang mga pasahero sa Ceres Terminal sa Barangay Camalig, Jaro, Iloilo City subong nga gab-i.
Sa pag-check sang Bombo News Team, wala na sang malawig nga pila ipaanggid kahapon kun sa diin lab-ot ang pila sang mga pasahero sa exit area samtang nga nagahingagaw para sa obserbasyon sang Undas.
Tubtub alas nueve ang byahe subong nga gab-i kag wala na sang extension. Kadam-an sa units nga nabilin ang may byahe nga Passi City kag sa Barotac.
Base sa operators, nangin bastante man ang units sang Vallacar Transit Inc. (VTI) agud nga ma-cater ang mga pasahero nga magabalik sa ila probinsya para sa long weekend.
Sa interview naman sang Bombo Radyo sa pasahero nga si Mary Jane Ibon nga naga-trabaho sa Banate sa masobra na duha ka tuig, iya ginpahayag nga ginpain gid niya ini nga adlaw agud nga makabalik sa Cebu kag makaupod ang iya nga pamilya.
Pahayag sini, duha ka beses siya nga nagapauli sa kada tuig.
Sa Lunes, magabalik naman ini diri sa Iloilo agud tapuson ang iya trabaho bilang mananahi.
Kaina sang aga, nanguna si Police Regional Office 6 Director BGen. Josefino Ligan sa pag-check sa major transport terminals sa Iloilo agud nga ma-check ang police deployment kag maghatag sang safety tips kag pahanumdom sa mga byahero kag drivers.#
