Nagpamatok ang mga pasahero sa ginaduso nga pagpasaka sang plete sa fiberboat nga may byahe nga Iloilo pa-Guimaras.
Ini matapos ang plano sang Guimaras Island Transport Multi-Purpose Cooperative nga ang anay regular fare nga P30, madugang ini sang P10 ukon magalab-ot na sa P40.
Sa discounted fare para sa mga studyante, senior citizens kag PWD, halin sa P24, magasaka ini sa P32; kag para sa nighttime rate naman, halin sa P30, mangin P45 na.
Sa interview sang Bombo Radyo kay Vancyrel Malcon, isa ka residente sang Guimaras nga naga-eskwela sa siudad sang Iloilo, iya ginpahayag nga dako nga huol para sa ila pananglitan nga madayun ang pagpatuman sang pagsaka sang plete.
Suno pa kay Malcon, dugang gid nga allowance halin sa iya ginikanan ang iya nga kinahanglanon pananglitan nga magsaka ang pamasahe.
Sa interview naman sang Bombo Radyo kay Janrex Casabuena, isa ka regular nga pasahero, iya man ginpahayag nga mabug-at gid ini para sa iya nga makapila gid magbalik-balik sa isla ang Guimaras.
Nagpahayag man si Casabuena nga kun presyo sang gatong ang basehan sa pagsaka sang plete, dapat nga wala gid sang tuman nga pagsaka bangud nga nagalain-lain man ang presyo sini kada semana.
