ILOILO – Nagtaas ang numero sang mga pasyente nga nagpaidalom sa maxillofacial surgery bangud man sa pagdamu sang vehicular accident nga ginakaulamiran sang mga motorsiklo sa Iloilo.
Sa interview sang Bombo Radyo kay Dr. Joy Ambos, espesyalista sa Ears, Nose and Throat Division sang Western Visayas Medical Center, iya ginpahayag nga sang 2017, naglab-ot sa 305 ang nagpaidalom sa maxillofacial surgery, 169 naman sang 2018 kag subong nga 2019, naglab-ot na sa 263 ang mga pasyente nga nagpaidalom sa surgery sa guya, baba ukon sag-ang bangud sa injury nga naangkon.
Suno kay Dr. Ambos, sa bahin sang Western Visayas Medical Center nga isa ka Level 3 hospital, gilayon nga ginapaidalom sa assessment ang biktima sang vehicular accident agud nga mahibalu-an kun ano nga procedure ang pagahimuon.
Bangud nga kalabanan sa mga pasyente ang biktima sang aksidente sa pagmaneho sang motorsiklo, sa guya gid ang masami nga injury.
Mas makapaayo suno kay Dr. Ambos nga operahan gilayon ang pasyente ilabi na kun naka-angkon ini sang fracture sa tul-an agud nga gilayon ini nga mabalik sa kinaandan paagi sa pagbutang sang surgery plates kag screws.
Kun wala sang side effects nga mabatyagan ang pasyente, wala na ginakuha ang surgery plates kag screw apang kun ang pasyente ang naga-edad sang mas manubo sa 14 anyos, kinahanglan ini nga kuhaon pagkatapos sang duha ka bulan agud nga indi mauntat ang bone growth.
Samtang, suno naman kay Dr. Francisco Ronnel Quiñon, chief of hospital sang Ramon Tabiana Memorial District Hospital, kun masarangan man lang nga bulngon ang mga pasytente sa mga Level 1 hospital kasubong sang mga district hospital sa probinsya sang Iloilo, indi na kinahanglan ang referral sa mga hospital sa syudad sang Iloilo nga may yara sang mga espesyalista.
Suno kay Dr. Quiñon, magluwas sa facial injuries, gasgas kag brain injury ang masami nga naangkon sang motorcycle riders.
Ginpahayag ni Dr. Quiñon nga delikado ang kahimtangan sang isa ka pasyente kun ini ang nakaangkon sang brain injury.
