ILOILO CITY – Amat-amat na nga ginapaguwa ang mga pasyente sa West Visayas State University Medical Center kasunod sang na record nga COVID-19 cases.
Sa interview sang Bombo Radyo kay Dr. Disodao Amargo, designated spokesperson sang nasambit nga hospital, iya ginpahayag nga ang mga pasyente sang OB, Pedia kag Medical Service Ward ang ginpang-discharge na matapos nga nagnegatibo sa confirmatory test lakip na diri ang mga medical staff kag ang mga pasyente nga una na nga nagpositibo sa COVID-19 paagi sa Rapid test.
Apisar sini suno kay Amargo, temporaryo anay nga ipauntat ang pagbaton sang pasyente sa nasambit nga mga department agud nga mahatagan sang ligwa ang pagpaninlo.
Ginpahayag ni Amargo nga temporaryo naman nga ginsiradhan ang Out-Patient Department bilang kabahin sang precautionary measure.
Sa subong, naglab-ot na sa 8 ka pasyente kag 10 ka medical staff sa nasambit nga hospital ang nagpositibo sa COVID-19.
